“Эрх мэдэл, албан тушаалын байдлаа урвуулан ашиглах” гэмт хэрэгт холбогдсон шүүгдэгч Б.Будхүү дараах мэдүүлгийг өглөө.

"Миний бие энэ зээл дээр зээлийн удирдлагын хорооны дүгнэлт шаардлага хангагдсан эсэхийг шалгах баримт бичигт гарын үсэгт зурсан гэх байдлаар буруутгагдаж байгаа.

Тус зээлийн шинжилгээний олгох нөхцөлтэй танилцуулга дээр хууль зүйн дүгнэлтийг хуульч Эрдэнэбилэг гаргаж миний бие хянасан. Уг дүгнэлт дээр чанаргүй зээлийн зээлийн үлдэгдэлгүй байх гэсэн шаардлагыг хангаагүй байна гэсэн асуудлыг дурдсан байдаг. Анхнаасаа компанид давуу байдал олгох зорилго байгаагүй.

Дүгнэлт гарсны дараа зээлийн хороо хуралдаад холбогдох нөхцөлүүдээ тавьж дүгнэлт гаргасан. Уг дүгнэлтийг үндэслэж ТУЗ-ийн шийдвэр гарч холбогдох гэрээнүүд нь гарсан байдаг.

“Ган хүдэр орд” ХХК нь шүүхийн шийдвэрээр иргэн хуулийн этгээдэд өр төлбөргүй болохыг тодорхойлов гэсэн баримт бичиг дээр гарын үсэг зурсан. Зээлийн мэргэжилтний нөхцөлүүдийг хангасан байна гэсэн баримт бичиг дээр үндэслэж л гарын үсэг зурсан.

Шүүхийн шийдвэрээр тогтоогдсон өр төлбөрийн тухайд тус шалгах хуудаст 2017 оны аравдугаар сарын 5-ны өдөр хангасан гэж зурсан.

Шийдвэр гүйцэтгэх газрын баримт бичиг нь албан ёсны эрх бүхий байгууллагаас гаргасан бичиг учраас би хүлээн зөвшөөрч зурахаас өөр аргагүй.

Би төрийн болон хувийн компаниудад олон жил ажилласан. Энэ хугацаанд төрийн албаны цалингаар байр орон сууцтай болох боломжгүй юм байна гэж үзээд, япон улсад 5 жил орчим ажилласан. Түүнээс хойш төрд ажиллаад миний орлого нэмэгдсэн тохиолдол байхгүй. Би хийх ёстой ажлаа л хийсэн. Хөгжлийн Банкны цалин миний амьдрал хэрэгцээнд хангалттай хүрч байсан учир хувьдаа ашиг сонирхол бүрдүүлэхээр явж байгаагүй” гэсэн юм.